×
Aprelin 15-də Azərbaycan Dövlət Pedaqoji Universitetində (ADPU) İqtisadi Əməkdaşlıq və İnkişaf Təşkilatının (İƏİT) Təhsil və bacarıqlar üzrə direktoru, eləcə də PISA (Şagird nailiyyətlərinin beynəlxalq qiymətləndirilməsi proqramı) rəhbəri Andreas Şleyxerin “Dünya standartları: XXI əsrin məktəbini necə qurmalı” kitabının təqdimatı olub. Kitab Təhsil Nazirliyinin dəstəyi ilə “T-Network” təhsil işçilərinin təcrübə və kommunikasiya platforması tərəfindən Azərbaycan dilində çap edilib.
AZƏRTAC xəbər verir ki, nəşrdə PISA tədqiqatlarına əsasən dünyanın müxtəlif ölkələrinin təhsil sistemlərinin müqayisəsi əsasında XXI əsrdə keyfiyyətli təhsil vermənin vasitələri araşdırılıb.
Tədbirdə çıxış edən təhsil naziri Emin Əmrullayev kitabın Azərbaycan dilinə tərcümə olunmasını yüksək qiymətləndirib. Nazir Azərbaycanın beynəlxalq qiymətləndirmə tədqiqatlarında iştirakından bəhs edib. O bildirib ki, Azərbaycanın 2006-cı ildən başladığı beynəlxalq qiymətləndirmələrdə iştirakı 2016-cı ildən yeni səviyyədə davam etdirilir. Azərbaycanın PISA tədqiqatında iştirak etməsinin özü təhsilimizin nailiyyətidir. Çünki bu tədqiqatlara qlobal təhsil standartlarına cavab verməyə hazır olan ölkələr cəlb edilir. Hazırda PISA qiymətləndirmə tədqiqatına yalnız Bakı məktəbləri cəlb olunub. Gələcəkdə bu tədqiqatda bütün Azərbaycan məktəblərinin iştirakı nəzərdə tutulur. Nazir qeyd edib ki, beynəlxalq qiymətləndirmələrdə iştirak Azərbaycan təhsil sistemi üçün bu yarış yox, düzgün qərarlar, dövlət siyasətinə dəstək verən faydalı bir alətdir.
Təhsil naziri vurğulayıb ki, kitab Azərbaycan təhsil ictimaiyyəti üçün dəyərli mənbə olacaq.
ADPU-nun rektoru professor Cəfər Cəfərov bildirib ki, Azərbaycan 2006-cı ildən etibarən PISA beynəlxalq qiymətləndirməsində iştirak etməyə başlayıb. Bu tip tədqiqatlar, o cümlədən belə kitablar təhsil sistemimizdə müsbət dəyişikliklərə əsas yaradır. Bu günün və gələcəyin təhsili insanların xoşbəxtliyi və səriştələrə yiyələnmələri əsasında qurulmalıdır.
Rektor Cəfər Cəfərov qeyd edib ki, universitetin məqsədi keyfiyyətli müəllim kadrları hazırlamaqdır: “Təhsil sisteminin keyfiyyəti bu sistemin müəllimlərindən əsaslı dərəcədə asılıdır. Bu istiqamətdə ADPU-da da beynəlxalq təcrübə öyrənilir və tətbiq edilir. İnanıram ki, təhsilin inkişafı naminə qarşıya qoyulan hədəflərə birlikdə çatacağıq”. Rektor diqqətə çatdırıb ki, kitabdan ADPU-nun magistratura pilləsində təhsil alan tələbələr dərslik kimi istifadə edəcəklər.
“T-Network” təhsil işçilərinin təcrübə və kommunikasiya platformasının koordinatoru və yaradıcılarından biri Cəfər Mənsimi platforma haqqında ətraflı məlumat verib. O, kitabın ərsəyə gəlməsi prosesindən danışıb.
Təqdimat çərçivəsində kitabın müəllifi Andreas Şleyxer “Dünya standartları: XXI əsrin məktəbini necə qurmalı” mövzusunda ustad dərsi keçib. O bildirib ki, PISA yarış deyil, bu, beynəlxalq tədqiqat güzgüdür. Bu güzgüdə ölkələr öz təhsil sistemlərini görə bilirlər. Gələcəkdə çalışmaq lazımdır ki, təhsil elmi tədqiqat sahəsinə çevrilsin. Bu bizə “necə edək ki, təhsilalanlar yaxşı öyrənsinlər” məsələsinin həlli yolunu tapmağa kömək edəcək. Andreas Şleyxer daha yaxşı nəticələrə nail olmaq üçün müəllimlərin səriştələrinin artırılması üzərində çalışmağın vacibliyini vurğulayıb.
Andreas Şleyxer dünya təhsil sisteminin keçdiyi inkişaf yoluna nəzər salıb, təhsilin inkişafı istiqamətində görülən işlərdən danışıb.
Təqdimatda Təhsil Nazirliyinin və tabe qurumların rəsmi şəxsləri, ali təhsil müəssisələrinin rektorları, nazirlik yanında İctimai Şuranın üzvləri, təhsil ekspertləri, məktəb direktorları, müəllimlər, tanınmış elm xadimləri, QHT və KİV təmsilçiləri, beynəlxalq təşkilatların əməkdaşları iştirak ediblər. İştirakçılara kitab hədiyyə olunub.
Qeyd edək ki, Andreas Şleyxer PISA, habelə təhsil siyasətinə və təcrübələrinə innovasiyalar tətbiq etmək və onları dəyişdirmək üçün siyasətçilər, tədqiqatçılar və müəllimlərə yönələn qlobal platforma yaratmış digər beynəlxalq alətlərin təşəbbüskarı və koordinatorudur. O, təhsildə keyfiyyəti və bərabərliyi təkmilləşdirmək üçün 20 ildən çoxdur dünya üzrə təhsil nazirləri və liderləri ilə birlikdə işləyir.