“Gələcək üçün peşə təhsili və təlimi” layihəsinin özəl sektorla əməkdaşlığı çərçivəsində iki il ərzində dual /iş yerində öyrənmə proqramına 32 şirkət qoşulub.

AZƏRTAC xəbər verir ki, bunu BMT İP - “Gələcək üçün Peşə təhsili və təlimi: Azərbaycanda qabaqcıl peşə təhsili mərkəzlərinin yaradılmasına dəstək” layihəsinin meneceri Eltəkin Ömərov “Dual peşə təhsili proqramı”nın yekun tədbirində deyib.

Onun sözlərinə görə, 8 peşə təhsili müəssisəsindən 41, özəl sektordan isə 126 mentor turizm və qonaqpərvərlik, nəqliyyat, mebel istehsalı və media istiqamətləri daxil olmaqla 24 müxtəlif peşə üzrə prosesə cəlb olunub. Layihənin dəstəyi ilə Bakı, Cəlilabad, Gəncə, Lənkəran və Şəki şəhərlərindən 573 tələbə bu proqramda iştirak edib. Məzunların 70 faizindən çoxu təcrübədə olduğu şirkətlərdən rəsmi iş təklifi alıb.