Dekabrın 2-də Azərbaycan Dillər Universitetində (ADU) “Dəyişən dünyada mədəniyyətlərin dialoqu” adlı beynəlxalq forum keçirilib. Tədbir Rus Dünyası Fondu, Bakı Rus Evi, Voronej Dövlət Universiteti və ADU-nun birgə təşkilatçılığı ilə reallaşıb.

AZƏRTAC xəbər verir ki, beynəlxalq forumda Azərbaycan Dillər Universitetinin rektoru akademik Kamal Abdulla, Rusiya Federasiyasının ölkəmizdəki səfiri Mixail Evdokimov, Azərbaycan Respublikası Dövlət Gömrük Komitəsinin sədri Şahin Bağırov, Voronej Dövlət Universitetinin prorektoru Yuri Bubnov, Dövlət Gömrük Komitəsinin Gömrük Akademiyasının rəisi Qulu Novruzov, “Rossotrudniçestvo”nun Azərbaycan Respublikasındakı nümayəndəliyinin rəhbəri İrek Zinnurov çıxış ediblər.

Beynəlxalq forumun əhəmiyyətindən danışan çıxışçılar gələcək elmi, mədəni əlaqələrin inkişafı, xarici əlaqələrin qurulması, tərəfdaşlıq münasibətlərinin yeni mərhələləri haqqında məlumat veriblər.

Qeyd olunub ki, Azərbaycanda multikultural, demokratik və humanitar siyasət özünü yüksək səviyyədə göstərir. Bildirilib ki, müasir dövrdə mədəniyyətlər sürətlə dəyişir və daha da şaxələnir. Bu dəyişiklik və şəxələnmə prosesinin cəmiyyətlər üzərində böyük təsirləri olur. Mədəni müxtəliflik cəmiyyətin ən önəmli elementidir, çünki tarixboyu mədəni müxtəlifliklərin yaranmasına bir sıra amillər səbəb olub.

Sərhədlərarası köç, qloballaşmanın mədəniyyətlər üzərindəki təsirləri, milli azlıqların məskunlaşdığı ərazilərdə mədəni kimlik iddiaları, regionlararası artan asılılıq və informasiya-kommunikasiyanın daha da təkmilləşərək beynəlxalq miqyaslı sürətlə yayılması bu səbəblərdən sadəcə bir neçəsidir.

Beynəlxalq forum işini bölmə iclasları ilə davam etdirib.

Qeyd edək ki, “Dəyişən dünyada mədəniyyətlərin dialoqu” adlı beynəlxalq forum dekabrın 5-nə kimi öz işini davam etdirəcək.