Fevralın 13-də uzunmüddətli fasilədən sonra “İçərişəhər” Ənənəvi İncəsənət Mərkəzinin nəzdində fəaliyyət göstərən milli “Dastan” brendinin rəsmi sərgi-satış məkanı əsaslı bərpa və təmirdən sonra yenidən istifadəyə verilib. Eyni zamanda, Türk dünyasının ortaq mədəni irsini əks etdirən “Turan ruhu” adlı yeni kolleksiyanın təqdimatı keçirilib.

AZƏRTAC xəbər verir ki, tədbiri giriş sözü ilə açan “İçərişəhər” Dövlət Tarix-Memarlıq Qoruğu İdarə Heyətinin sədri Rüfət Mahmud bildirib ki, bir xalqın gücünü görmək istəyən hər kəs onun yaratdığı sənətə baxmalıdır.

Onun sözlərinə görə, İçərişəhər bu ruhun əsrlər boyu qorunduğu, formalaşdığı və bu günə qədər gəlib çatdığı müqəddəs məkandır. Rüfət Mahmud son dövrdə işi yeni mərhələyə daşımaq üçün vacib institusional tədbirlərin həyata keçirildiyini də diqqətə çatdırıb: idarəetmə strukturu təkmilləşdirilib, daxili proseslər nizamlanıb, peşəkar komanda formalaşdırılıb, kadr potensialının gücləndirilməsi prioritet istiqamət kimi müəyyən olunub.

“Bu gün “Dastan” daha dayanıqlı təməl, aydın strategiya və geniş inkişaf perspektivi ilə fəaliyyətini davam etdirir”, – deyə o əlavə edib.

Rüfət Mahmud vurğulayıb ki, məqsəd sənəti yalnız qorumaq deyil, onu həyatın içində yaşatmaqdır: “Burada ustad işləyəcək. Burada şagird öyrənəcək. Burada qonaq baxmaqla kifayətlənməyəcək, anlayacaq və hiss edəcək. Ənənə vitrində yox, prosesdə yaşayacaq”.

İdarə Heyətinin sədri tədbir çərçivəsində təqdim olunan “Turan ruhu” adlı yeni kolleksiyanın xüsusi məna daşıdığını da bildirib.

Qeyd edək ki, “Dastan” brendinin sayca 6-cı kolleksiyası olan “Turan ruhu” layihəsi Azərbaycan və digər türk dövlətlərinin zəngin mədəni irsindən, tarixi-memarlıq abidələrindən, dekorativ-tətbiqi sənət nümunələrindən, günümüzədək qorunub saxlanılmış mənbələrdən ilhamlanaraq hazırlanıb. Doqquz dizaynerin ərsəyə gətirdiyi və 100-ə yaxın məhsulu əhatə edən kolleksiyada keramika (dekorativ boşqablar, güldanlar, çay dəsti), batika (ipək şərflər və kəlağayılar), ağacişləmə (güzgü, nərd, mücrü, fotoçərçivə, masaüstü lampa, dekorativ güldan) və zərgərlik (qolbaq, sırğa, üzüklər) üzrə müxtəlif nümunələr təqdim olunur.

Kolleksiya çərçivəsində məhsullar müxtəlif bədii və texniki yanaşmalar əsasında hazırlanıb, UNESCO-nun Qeyri-Maddi Mədəni İrs Siyahısına daxil edilmiş sədəfkəsmə, şəbəkə sənəti və kəlağayıbasma texnikasından istifadə edilib. Layihənin əsas məqsədi türkdilli xalqların mədəniyyətinin təbliği, canlandırılması və gələcək nəsillərə ötürülməsidir.