Bakıda Türkiyə Cümhuriyyətinin yaradılmasının 103-cü ildönümünə həsr olunmuş “Çanaqqaladan Bakıya – Ortaq mədəniyyət” adlı sərginin açılış mərasimi keçirilib.

AZƏRTAC xəbər verir ki, tədbir Azərbaycanın və Türkiyənin müstəqilliyi, ərazi bütövlüyü uğrunda canlarından keçmiş şəhidlərin əziz xatirəsinin yad edilməsi ilə başlayıb. Ardınca hər iki ölkənin Dövlət himnləri səsləndirilib.

Mərasimdə çıxış edən Xalq rəssamı Arif Hüseynov bildirib ki, ortaq tarixə, milli-mənəvi dəyərlərə və zəngin mədəni irsə malik iki qardaş xalq arasında münasibətlər incəsənət sahəsində də özünü aydın şəkildə göstərir. “Bizim musiqimiz, tariximiz və mədəniyyətimiz hər zaman bir-biri ilə sıx bağlı olub və bundan sonra da belə olacaq. Bu sərgi də Azərbaycan-Türkiyə qardaşlığının və mədəni birliyinin daha bir təzahürüdür”, – deyə Arif Hüseynov vurğulayıb.

Çanaqqala Onsekiz Mart Universitetinin rektoru, professor Ramazan Cüneyt Erenoğlu çıxışında sərginin “Bir millət, iki dövlət” prinsipi əsasında həyata keçirilən mədəni əməkdaşlığın mühüm nümunəsi olduğunu bildirib. Qeyd edib ki, Çanaqqala Onsekiz Mart Universiteti müxtəlif ölkələrdən olan minlərlə beynəlxalq tələbəyə təhsil verir və onların arasında azərbaycanlı gənclər xüsusi yer tutur. Azərbaycan ilə Türkiyə arasında akademik və elmi əməkdaşlığın genişləndirilməsinin vacibliyini vurğulayan rektor universitetin TİKA ilə birgə Bakıda yaşıl transformasiya və yaşıl bacarıqlar üzrə təlim layihələri həyata keçirdiyini bildirib.

Türkiyənin Ezine rayonunun icra nümayəndəsi Yusuf Kaptanoğlu çıxışında bildirib ki, Çanaqqala türk xalqının müstəqillik uğrunda göstərdiyi fədakarlığın rəmzi, Bakı isə Azərbaycan-Türkiyə qardaşlığının və ortaq mədəni dəyərlərin yaşadıldığı mühüm mərkəzdir. “Azərbaycan ilə Türkiyə arasındakı qardaşlıq yalnız tarixi hadisələrdə deyil, gündəlik həyatımızda, dilimizdə, musiqimizdə, sənətimizdə və adət-ənənələrimizdə də özünü göstərir. Biz bir-birimizin sevincini öz sevincimiz, kədərini isə öz kədərimiz hesab edirik”, – deyə Y.Kaptanoğlu qeyd edib.

Türkiyənin Azərbaycandakı səfiri Birol Akgün çıxışında iki ölkə arasındakı qardaşlıq münasibətlərinin ortaq tarixə, qarşılıqlı fədakarlığa və sarsılmaz mənəvi bağlara əsaslandığını bildirib. Diplomat Türkiyə Cümhuriyyətinin qurucusu Mustafa Kamal Atatürkün, Azərbaycan xalqının Ümummilli Lideri Heydər Əliyevin və hər iki ölkənin müstəqilliyi uğrunda mübarizə aparmış insanların xidmətlərini ehtiramla xatırladıb.

Qardaş ölkənin mədəniyyət və turizm nazirinin müavini Coşkun Yılmaz çıxışında sərginin Azərbaycan və Türkiyə arasında tarixi-mədəni birliyin nümayişi baxımından xüsusi əhəmiyyət daşıdığını söyləyib. Çanaqqala şəhidliklərində müxtəlif türk və müsəlman xalqlarının nümayəndələrinin xatirəsinin yaşadıldığını bildirən nazir müavini burada azərbaycanlı şəhidlərin də ehtiramla yad edildiyini vurğulayıb.

Tədbir bədii proqramla davam edib.

Daha sonra layihənin həyata keçirilməsində əməyi və dəstəyi olan şəxslərə, eləcə də qurumların nümayəndələrinə təşəkkürnamələr təqdim olunub.

Sonda qonaqlar sərgi ekspozisiyası ilə tanış olub, Azərbaycan və Türkiyə sənətkarlarının ortaq tarixi yaddaşı, milli-mədəni dəyərləri və qardaşlıq münasibətlərini əks etdirən əsərlərinə baxıblar.