“Benilüks” Azərbaycanlıları Konqresinin və “Dayaq” Vətən Müharibəsi Əlillərinə və Şəhid ailələrinə dəstək təşkilatı “Yüksəliş Gənclər Hərəkatı”nın tərəfdaşlığı ilə Ramazan ayı münasibətilə şəhid ailələri və Vətən müharibəsi əlilləri üçün iftar süfrəsi təşkil edib.

AZƏRTAC xəbər verir ki, iftar süfrəsində “Benilüks” Azərbaycanlıları Konqresinin rəhbəri Elsevər Məmmədov Prezident, Müzəffər Ali Baş Komandan İlham Əliyevin rəhbərliyi ilə Azərbaycan Ordusunun böyük Qələbə qazandığını qeyd edib. O, qeyd edib ki, rəhbərlik etdiyi qurum “Dayaq” təşkilatı ilə əməkdaşlıq çərçivəsində müharibə və postmüharibə dövründə şəhid ailələri və Vətən müharibəsi əlilləri ilə bağlı müxtəlif formatlı layihələrdə dəstəyini göstərib. Konqres sədri vurğulayıb ki, Dünya Azərbaycanlılarının V Qurultayının məhz erməni işğalından azad edilmiş, Azərbaycanın mədəniyyət paytaxtı, əziz və doğma Şuşa şəhərində keçirilməsi böyük önəm daşıyır.

“Dayaq” Vətən Müharibəsi Əlillərinə və Şəhid ailələrinə dəstək Təşkilatının sədri Qalib Əliyev müqəddəs Ramazan ayı münasibətilə şəhid ailələrini və tədbir iştirakçılarını təbrik edib. O, iftar məclisində iştirak edən ailələrin qəhrəmanlarımızın bizlərə əmanətləri olduğunu, məhz həmin oğullarımızın dövlətimizin başçısının rəhbərliyi ilə döyüş meydanında tarix yazdığını, haqq savaşında şücaət göstərərək düşmənin 30 ilə yaxın işğal altında saxladığı torpaqlarımızı azad etməklə xalqımıza möhtəşəm Qələbə bəxş etdiklərini diqqətə çatdırıb.

Qeyd edək ki, iftar süfrəsində şəhid ailələri, qazilər, Milli Məclisin deputatları, qeyri-hökumət təşkilatlarının nümayəndələri, iş adamları iştirak ediblər.