Çempion olduğumuz üçün çox şadam. Həqiqətən burada çox gözəl şərait var. Bakıda qalib gəldiyimiz üçün şadam. Sözün açığı, hisslərimi ifadə edə bilmirəm. Belə gözəl yarışda, möhtəşəm məkanda qalib olduğum üçün özümlə fəxr edirəm.

AZƏRTAC xəbər verir ki, bu sözləri dünya kuboku turnirində kişilər arasında 10 metr məsafəyə pnevmatik tüfəngdən atəşaçma üzrə komanda yarışında qızıl medal qazanan İran millisinin üzvü Cavad Foruqhi bildirib.

Komandanın digər üzvü Sacad Lafmejani müsahibəsində fərdi yarışlarda qələbə qazana bilmədiyi üçün təssüfləndiyini deyib: “Azərbaycanda keçirilən dünya kubokunda güclü idmançılar iştirak edir. Bu da bizə bir az çətinlik yaratdı. Atletlərin hamısı yüksək səviyyəli idmançılardır. Açığı təşkilatçılıq Olimpiya Oyunlarındakından da yaxşıdır. Elə ölkələr var ki, dünya kuboku yarışlarını normal keçirə bilmir. Azərbaycan bu baxımdan digərləri üçün örnəkdir. Həqiqətən təşkilatçıların çox əziyyət çəkdiyini görürük. Buna rəğmən, hər şey mükəmməl səviyyədədir”.

Qalib komandanın üçüncü üzvü Məhəmmədrəsul Efati də təəssüratlarını bölüşüb: “Çempion olduğum üçün xoşbəxtəm. İtaliya ilə final matçı olduqca çətin keçdi. Demək olar ki, onlarla bərabər səviyyədə mübarizə apardıq. Amma çempion olacağımıza əmin edim. Azərbaycana belə möhtəşəm yarışı təşkil etdiyi üçün xüsusi təşəkkürümüzü bildiririk”.