Əmək və Əhalinin Sosial Müdafiəsi Nazirliyi və Dünya Bankının birgə icra etdiyi “Azərbaycanda məşğulluğa dəstək” layihəsi iştirakçılarına seçdikləri sahələr üzrə aktivlərin təqdim edilməsinə başlanılıb.

AZƏRTAC xəbər verir ki, özünüməşğulluq proqramına dəstək məqsədi daşıyan layihə çərçivəsində işsiz şəxslərə istehsal-xidmət sahəsi üzrə avadanlıqlar təqdim edilib.

Özünüməşğulluq proqramına qoşulan Habil Əliyev əslən Ağdam rayonunun Şıxbabalı kəndindəndir. Bakı Slavyan Universitetinin regionşünaslıq fakültəsini bitirib. Ötən ilin payızında hərbi xidmətini başa vurub. Məşğulluq problemi ilə üzləşib. Hazırda Bakının Qaraçuxur qəsəbəsindəki Şərq massivində yataqxanada yaşayır. İş tapmaq üçün bir sıra şirkətlərə müraciət edib, lakin ümidverici bir cavab almayıb. Habil deyir: “Əlim hər yerdən üzüləndən sonra qohumlar vasitəsilə məşğulluğa dəstək layihəsindən xəbər tutdum. Əmim qızı Samirə də həmin layihəyə qoşulmuşdu. O, Əmək və Əhalinin Sosial Müdafiəsi Nazirliyinin tabeliyindəki Dövlət Məşğulluq Agentliyinə etdiyi müraciətdən sonra təlimlərə cəlb olunub, uğurlu biznes planı tərtib edib və dərzilik fəaliyyəti ilə məşğul olmaq üçün lazımi avadanlıqlarla təchiz edilib. Bir neçə ay əvvəl mən də həmin proqrama qoşulmaq üçün müraciət etdim. Bundan sonra təlim kursuna dəvət olundum. Kursu bitirəndən sonra müraciətimə müsbət cavab aldım. Artıq foto sənəti ilə məşğul olmaq üçün hər cür avadanlıqla təmin olunmuşam. Bu gün mənə fotoaparat, nootbuk, rəngli printer və çətir verdilər. Hələ orta məktəb illərindən foto sənətinə böyük həvəsim olub. Hərbi xidmətdən əvvəl də bir müddət bu işlə məşğul olmuşam. İndi şükürlər olsun ki, bu işlə müstəqil məşğul olmaq üçün özümün istənilən avadanlığım var. Hesab edirəm ki, ən yaxın günlərdə işə başlaya bilərəm”.

Arifə Qasımova Qaraçuxur qəsəbəsində İ. Musayev küçəsində yaşayır, foto həvəskarıdır. O, lap gənclik illərindən bu sənətə maraq göstərib. Lakin ailə həyatı qurandan sonra bir müddət ona fasilə verib. Övladları böyüyəndən sonra yenidən öz sevimli sənətinə qayıdıb. Şadlıq saraylarında və digər kütləvi tədbirlərdə çəkilişlər aparıb. İki övlad anasıdır. Həyat yoldaşı isə pensiyaçıdır. Keçən il Dövlət Məşğulluq Agentliyinə müraciət edib.

Özünüməşğulluq proqramının iştirakçıları sırasına qoşulan Arifə deyir: “Pandemiya başlayandan sonra əmək fəaliyyətimdə xeyli problemlərlə üzləşdim. Əlbəttə, mövcud vəziyyət dörd nəfərdən ibarət ailəmizin büdcəsinə də təsir göstərmişdi. Ona görə də bu layihəyə qoşulmaq arzusu ilə müraciət etdim. Müraciətimdən sonra təlimlərdə iştirak etdim. İndi isə lazım olan bütü foto avadanlıqları ilə təmin olunmuşam. Bu dəstəyə görə nazirliyə və onun müvafiq idarələrinə minnətdarlıq edirəm”.

Layihənin digər bir iştirakçısı Elvin Hüseynovun 29 yaşı var. Füzuli rayonunun Horadiz qəsəbəsində doğulub. Paytaxtın Binəqədi rayonunda Abay Kunanbayev küçəsində yaşayır. Təxminən 5 il foto çəkilişlərlə məşğul olub. Lakin pandemiya başlayanda bütün avadanlıqlarını satmaq məcburiyyətində qalıb. Lakin işləmək, çox sevdiyi foto sənəti ilə məşğul olmaq arzusu bir an da olsun onu tərk etməyib. Nazirliyin 4 nömrəli ərazi filialına müraciəti isə müsbət cavablandırılıb. Elvin deyir: ”Əvvəlcə məni təlim kursuna dəvət etdilər. Biznesin inkişafı ilə əlaqədar on təlim kursunda iştirak etdim. Onlayn qaydada uğurla imtahan verdim. Səbirsizliklə avadanlıqlarla təmin olunacağım günü və işə başlayacağımı gözləyirdim. Artıq hər şey hazırdır. Günü sabahdan fəaliyyətə başlaya bilərəm. Bir müddət sonra isə daha peşəkar çəkilişlər aparıb fəaliyyət sahəmi genişləndirməyi düşünürəm”.

Məşğulluğa dəstək layihəsinin əməkdaşı Fərrux Nəcəfovun dediyinə görə, layihə beş il ərzində ölkə üzrə 22 min işsiz şəxsin hazırladıqları biznes planına əsasən özünüməşğulluq proqramına cəlb olunmasını və onların kiçik biznesə çıxışını təmin etməyi nəzərdə tutur. Onlardan artıq 6003 nəfər qeydiyyata alınaraq təlimlərə cəlb olunub. Təlimləri bitirərək biznes planları uğurlu hesab olunanlara isə aktivlər verilir.

Layihənin əsas məqsədi ən yaxşı təcrübələr əsasında özünüməşğulluq proqramının genişləndirilməsi və işsiz şəxslərin özünüməşğulluq fəaliyyəti əsasında kiçik biznes imkanlarına sahib olmaq üçün şərait yaradılmasıdır.