Avqustun 3-də kişi voleybolçulardan ibarət Azərbaycan millisi “Avro-2023”ün təsnifat mərhələsində ilk oyununu keçirib.

AZƏRTAC xəbər verir ki, millimiz Bakıda Voleybol Mərkəzində Danimarka yığmasını qəbul edib.

Gərgin idman mübarizəsi şəraitində keçən oyun Danimarka seçməsinin 3:1 hesablı qələbəsi ilə yekunlaşıb.

Yığmamız “Avro-2023”ün təsnifat oyunlarında A qrupunda mübarizə aparır. Komandamızın rəqibləri Türkiyə və Danimarka milliləridir.

Millimiz növbəti oyununu avqustun 6-da Bakıda Türkiyə yığmasına qarşı keçirəcək.

Ümumilikdə təsnifat oyunlarında 26 komanda 7 qrupa bölünüb. Qrupun ən güclüləri və 5 ən yaxşı ikinci yerin sahibi final mərhələsində iştirak hüququ qazanacaq.