Nizami Kino Mərkəzində “Akinak” tammetrajlı bədii filmi nümayiş olunub.

AZƏRTAC xəbər verir ki, tədbirdən əvvəl çıxış edən Kino Mərkəzinin direktorunun səlahiyyətlərini icra edən Turan Məmmədli ekran əsəri barədə məlumat verib.

Filmin quruluşçu rejissoru, Əməkdar incəsənət xadimi Elxan Cəfərov qeyd edib ki, tarixi macəra filmində Azərbaycanın qədim dövlətçilik keçmişinə tamamilə yeni ideoloji prizmadan yanaşılır. “Filmdə hadisələr indiki Azərbaycan ərazilərində vaxtilə mövcud olan qədim İşquz (İç Oğuz) dövlətində cərəyan edir. Düşmən hücumuna məruz qalan dövləti və xalqı xilas etmək üçün vaxtilə Göylərdən göndərilmiş dörd müqəddəs əmanətdən biri olan "Akinak" qılıncını tapmaq lazımdır. Bu ağır və taleyüklü missiyanı yerinə yetirmək üçün dörd cəsur gənc təhlükələrlə dolu yola çıxır. Onlar hədəfə çatmaq üçün həm real düşmənlərlə, həm də onların qurduğu qaranlıq tilsimlərlə mübarizə aparmalı olurlar”,- deyə o əlavə edib.

Mədəniyyət Nazirliyi və Azərbaycan Respublikası Kino Agentliyinin dəstəyi ilə “Narimanfilm” MMC tərəfindən istehsal olunan ekran əsərinin quruluşçu rejissoru Əməkdar incəsənət xadimi Elxan Cəfərov, ssenari müəllifləri İlqar Safat, Azər Ziyadlı, İrəvani və Lətif Lətifsoylar, quruluşçu operatoru Ruslan Ağazadədir.

Ekran əsəri mayın 1-dən ölkənin bütün kinoteatrlarında geniş tamaşaçı kütləsinə təqdim olunacaq.