Milli Azərbaycan Tarixi Muzeyində “Akademik Ziya Bünyadov-100” adlı kataloqun təqdimatı olub.
AZƏRTAC xəbər verir ki, kataloq akademik Ziya Bünyadovun Milli Azərbaycan Tarixi Muzeyində toplanan materialları əsasında tərtib olunub.
×
Milli Azərbaycan Tarixi Muzeyində “Akademik Ziya Bünyadov-100” adlı kataloqun təqdimatı olub.
AZƏRTAC xəbər verir ki, kataloq akademik Ziya Bünyadovun Milli Azərbaycan Tarixi Muzeyində toplanan materialları əsasında tərtib olunub. Kataloqa alimin fotoşəkilləri, sənədləri, əlyazmaları və s. daxil edilib. Kataloqun tərtibçisi muzeyin elmi işlər üzrə direktor müavini, tarix elmləri doktoru Fərhad Cabbarovun verdiyi məlumata görə, Ziya Bünyadovun əşyaları muzeyə ilk dəfə 1968-ci ildə daxil edilib: “General-polkovnik N.Berzarinin Sovet İttifaqı Qəhrəmanı, kapitan Ziya Bünyadova “Lenin” ordeni və “Qızıl Ulduz” medalını təqdim etdiyini əks etdirən fotoşəkil, İ.Stalinin Almaniyanın paytaxtı Berlin şəhərinin alınmasına görə kapitan Ziya Bünyadova və onun döyüşdüyü bütün hərbi birləşməyə təşəkkür elan etdiyini bildirən sənəd və Ziya Bünyadovun müharibə vaxtı istifadə etdiyi planşet görkəmli alimin muzeydə qorunan kolleksiyasının ilk eksponatlarıdır. Növbəti illərdə – akademik Ziya Bünyadovun vəfatından sonra ona məxsus əşyalar ailəsi tərəfindən muzeyə təqdim olunub”.
Təqdimat mərasimində çıxış edənlər akademik Ziya Bünyadovun Azərbaycan elminə verdiyi töhfələrdən, onun ictimai-siyasi fəaliyyətindən, zəngin irsindən danışaraq, muzeyin çap etdirdiyi kataloqun dəyərli nəşr olduğunu bildiriblər.