Ötən il BMT-nin İnsan Hüquqları üzrə Ali Komissarlığı Ümumdünya Səhiyyə Təşkilatı ilə birgə “Psixi sağlamlıq, insan hüquqları və qanunvericilik: rəhbər prinsiplər və təcrübə” adlı sənədi ictimaiyyətə təqdim edib. Bu sənəd dünya ölkələrinə psixiatriya sahəsində islahatlar aparmaq üçün qanunvericiliyin təkmilləşdirilməsi və bununla da keyfiyyətli psixiatriya yardımının göstərilməsi məqsədilə hazırlanıb.

AZƏRTAC xəbər verir ki, bunu insan hüquqları üzrə müvəkkil (ombudsman) Səbinə Əliyeva "Azərbaycanda psixi sağlamlıq və psixi xəstəliklərdən əziyyət çəkən şəxslərin hüquqları” mövzusuna həsr olunmuş dəyirmi masada çıxışı zamanı deyib.

Ombudsman qeyd edib: “Adıçəkilən sənəd hazırda tərəfimizdən təhlil edilir və qanunvericiliyin təkmilləşdirilməsi baxımından zəruri hesab ediləcək təkliflər Milli Məclisə təqdim olunacaq.

Hesab edirəm ki, bu sahədə aidiyyəti dövlət orqanlarının da həmin sənədlə yaxından tanış olmaları zəruridir”.