Azərbaycan Respublikası Xarici İşlər Nazirliyi və ADA Universitetinin birgə təşkilatçılığı ilə nazirliyin nəzdində fəaliyyət göstərən diplomatiya könüllüləri üçün ənənəvi olaraq “Diplomatiya həftəsi” layihəsi həyata keçirilir. Ulu Öndər Heydər Əliyevin anadan olmasının 100 illiyinə həsr olunmuş “Diplomatiya həftəsi” çərçivəsində layihə iştirakçıları dekabrın 21-də Azərbaycan Dövlət İnformasiya Agentliyində (AZƏRTAC) olublar.

Diplomatiya könüllüləri əvvəlcə Ümummilli Lider Heydər Əliyevin, Prezident İlham Əliyevin və birinci xanım Mehriban Əliyevanın mətbuatla bağlı tədbirlərdə iştirakını, Müzəffər Ali Baş Komandanın Vətən müharibəsi dövründə xalqa müraciətlərini, işğaldan azad olunmuş bölgələrə səfərlərini əks etdirən fotolara, həmçinin AZƏRTAC-ın müxtəlif dövrlərdə istifadə etdiyi texniki avadanlıqlardan ibarət eksponatlara baxıblar.

İştirakçılar AZƏRTAC-ın şəhid jurnalisti Məhərrəm İbrahimovun xatirə guşəsi ilə tanış olublar, onlara jurnalistin həyat yolu barədə ətraflı danışılıb.

Bundan əlavə, tələbələr informasiyanın alınması, buraxılışa hazırlanması və redaktəsi prosesi ilə bağlı məlumatlandırılıblar.

Tələbələrlə görüşdə AZƏRTAC-ın İdarə Heyətinin sədri Vüqar Əliyev müasir Azərbaycan mətbuatının inkişafında və formalaşmasında Ulu Öndər Heydər Əliyevin əvəzsiz xidmətlərindən söz açıb. O Ümummilli Liderin 1993-cü ildə xalqın təkidli tələbi ilə hakimiyyətə qayıdışından sonra mətbuatımızın tarixində də yeni mərhələnin açıldığını vurğulayıb. Bildirib ki, dahi lider Heydər Əliyev bütün sahələrdə olduğu kimi, Azərbaycan milli mətbuatının inkişafında da misilsiz xidmətlər göstərib. Azərbaycan mətbuatı və mediası Ulu Öndərin ölkəmizə rəhbərlik etdiyi müstəqillik dövründə böyük inkişaf yolu keçib. Heydər Əliyevin 1998-ci ildə imzaladığı Fərmanla ölkədə söz, fikir və mətbuat azadlığı təmin edilib, Azərbaycanda senzuranın ləğvi milli mətbuatın inkişafında əsaslı dönüş yaradıb, kütləvi informasiya vasitələrinin inkişafına təkan verib. İdarə Heyətinin sədri bildirib ki, Ulu Öndərin mediaya və mətbuat nümayəndələrinə göstərdiyi diqqət və qayğı onun layiqli davamçısı Prezident İlham Əliyev tərəfindən uğurla davam etdirilir. Ulu Öndərin hakimiyyəti illərində AZƏRTAC-ın inkişafı, onun strukturunun, maddi-texniki bazasının gücləndirilməsi istiqamətində bir sıra mühüm işlərin görüldüyünü deyən Agentlik rəhbəri bu sahədə bir sıra mühüm fərman və sərəncamların imzalandığını da diqqətə çatdırıb.

AZƏRTAC-ın fəaliyyət istiqamətləri barədə məlumat verən Vüqar Əliyev gün ərzində Agentliyin informasiya resurslarında Azərbaycan, rus, ingilis, alman, fransız, ərəb, Çin və ispan dillərində xəbər dərc edildiyini, foto və videomaterialların yerləşdirildiyini söyləyib, qurumun 21 ölkədə müxbir məntəqəsinin fəaliyyət göstərdiyini bildirib. O son bir ildə Agentlikdə aparılan islahatlardan da danışıb.

Görüşdə feyk xəbərlərin qarşısının alınması, müasir dövrdə xəbər agentliyinin işinin təşkili, jurnalistlərin təhlükəsizliyi, cəmiyyət üçün maraq kəsb edən informasiya layihələrinin hazırlanması və digər mövzular ətrafında fikir mübadiləsi aparılıb.

Tədbirdə Xarici İşlər Nazirliyinin Mətbuat xidməti idarəsinin rəis müavini–şöbə müdiri Vasif Əliyev, ikinci katib Tural Balakişiyev və attaşe Nigar Eyvazzadə iştirak ediblər.