Yanvarın 23-də Bakı Dövlət Universitetinin (BDU) İctimai Nəzarət Şurasının üzvləri və KİV nümayəndələri payız semestrinin imtahan sessiyasını izləyiblər.
×
Yanvarın 23-də Bakı Dövlət Universitetinin (BDU) İctimai Nəzarət Şurasının üzvləri və KİV nümayəndələri payız semestrinin imtahan sessiyasını izləyiblər.
Əvvəlcə BDU-nun əsaslı təmir olunmuş 2 saylı tədris korpusunda yerləşən “Zəfər tarixi” lektoriyasında İctimai Nəzarət Şurasının iclası olub.
AZƏRTAC xəbər verir ki, iclasda BDU-nun rektoru Elçin Babayev şura üzvlərinə universitetdə son zamanlar həyata keçirilən yeniliklər və sessiyanın gedişi ilə bağlı məlumat verib. Qeyd edilib ki, ötən müddət ərzində BDU-nun 2 saylı tədris korpusu əsaslı təmir olunaraq tələbələrin ixtiyarına verilib. Binada tədris prosesinin daha da optimallaşdırılması üçün zəruri şərait yaradılıb, istilik, işıqlandırma, yanğın təhlükəsizliyi sistemi yenidən qurulub, bütün otaqlar mebel və kondisionerlərlə təchiz olunub. Binanın çardağının altı da tam təmir olunub və yaxın zamanlarda tələbələrin təlim keçmələri, asudə vaxtlarının təşkili üçün əlverişli bir məkana çevriləcək. Binanın həyətində də abadlıq işləri aparılıb, şəhidlərin xatirəsinə ucaldılmış abidə yenidən qurulub. Əsaslı yenidənqurma işləri BDU-nun digər korpuslarında da davam etdiriləcək.
E.Babayev yanvarın 23-də 5 min 360 nəfər tələbənin imtahan verdiyini xatırladıb. Qeyd olunub ki, BDU-da qış imtahan sessiyası yanvarın 7-dən başlayıb. Mərkəzləşmiş qaydada keçirilən imtahanlara şəffaf nəzarət mexanizmi qurulub, sui-istifadə hallarının qarşısı dərhal alınır. Sessiyanın gedişinə operativ nəzarət, tələbələrin biliyinin qiymətləndirilməsində şəffaflığı təmin etmək məqsədilə İmtahan Qərargahı və Apellyasiya Komissiyası yaradılıb. Komissiya sessiya müddətində imtahanların gedişi ilə əlaqədar ərizə, təklif, Elm və Təhsil Nazirliyinin "Qaynar xətt"i vasitəsilə daxil olmuş şikayətlərin operativ araşdırılmasını təmin edir.
Sonra İctimai Nəzarət Şurasının üzvləri və KİV nümayəndələri ayrı-ayrı auditoriyalarda imtahan prosesini müşahidə edib, tələbələrin imtahanların gedişinə münasibətləri ilə maraqlanıblar. Şura üzvləri, həmçinin BDU-nun 2 saylı tədris binasındakı yeniliklərlə tanış olublar.