Bakı Dövlət Universitetində (BDU) Geologiya fakültəsinin Faydalı qazıntılar kafedrasının müdiri, geologiya-mineralogiya elmləri doktoru, Əməkdar elm xadimi, Dövlət mükafatı laureatı, akademik Vasif Babazadənin 85 illik yubileyinə həsr olunmuş “Geologiya: nəzəriyyə və praktikanın vəhdəti” mövzusunda respublika elmi konfransı keçirilib.

AZƏRTAC xəbər verir ki, tədbirin açılış mərasimində çıxış edən BDU-nun rektoru Elçin Babayev akademik Vasif Babazadənin Azərbaycanda geologiya elminə böyük töhfələr verdiyini bildirib. Rektor qeyd edib ki, görkəmli geoloq alim bütün ömrünü Azərbaycan elminin, təhsilinin inkişafına həsr edib.

Görkəmli alim Vasif Babazadənin Azərbaycanda və xarici ölkələrdə 350-dən çox elmi əsəri, 40-dan artıq kitabı (monoqrafiya, dərslik, dərs vəsaitləri və s.) çap olunub. O, strateji əhəmiyyətli üç xəritənin müəllifidir. Alimin rəhbərliyi ilə 35 fəlsəfə, 11 elmlər doktoru hazırlanıb. Akademik V.Babazadə geologiya sahəsində Azərbaycan dilində yazılan ilk dərsliklərin müəllifidir. Görkəmli alimin 2 cilddə “Geoloji-kəşfiyyat işləri”, 4 cilddə “Faydalı qazıntıların geologiyası”, “Faydalı qazıntı yataqlarının axtarışı və kəşfiyyatı”, “Filiz sahələri və yataqlarının strukturu” və digər əsərləri elm və təhsilimiz üçün dəyərli mənbələrdir.

Rektor qeyd edib ki, Vasif Babazadənin müxtəlif istiqamətlərdə yaratdığı elmi məktəblərin təməli onun 1973-1980-ci illərdə dekanı olduğu Geologiya-coğrafiya fakültəsində qoyulub, hələ o illərdə görkəmli alim geologiya elminin və tədrisinin ciddi inkişafı üçün BDU-da ayrıca fakültəyə ehtiyac olduğunu bildirib. Beləliklə, BDU-nun Geologiya fakültəsi Vasif Babazadənin təşəbbüsü ilə yaradılıb. Alim fakültənin Faydalı qazıntılar kafedrasına rəhbərlik etməklə yanaşı, Yer ehtiyatlarının aerokosmik tədqiqatları elmi-tədqiqat laboratoriyasını da yaratmağa nail olub. Akademik Vasif Babazadə öz fəaliyyətində dövlətçilik, azərbaycançılıq, milli maraqlar sistemini həmişə rəhbər tutub. Alim “Yerin təki haqqında” Qanunun hazırlanıb qəbul edilməsində böyük xidmət göstərib. “Təhsil haqqında” qanun layihəsini hazırlayan işçi qrupun üzvü olub. Akademik Vasif Babazadənin məhsuldar fəaliyyəti dövlətimiz tərəfindən yüksək qiymətləndirilib. O, hələ 1978-ci ildə təbii resurslardan səmərəli istifadə etməklə bağlı silsilə əsərlərinə görə Azərbaycan SSR Dövlət Mükafatına layiq görülüb. 2000-ci ildə Ulu Öndər Heydər Əliyevin Sərəncamı ilə Vasif Babazadə “Əməkdar elm xadimi” fəxri adına layiq görülüb. Prezident İlham Əliyevin müvafiq sərəncamları ilə alim 2009-cu ildə “Şöhrət”, 2018-ci ildə “Şərəf” ordenləri ilə mükafatlandırılıb. 2019-cu ildə “Azərbaycan Respublikası Prezidentinin fəxri diplomu” ilə təltif edilib. Görkəmli alim 2017-ci ildə AMEA-nın akademik Musa Əliyev adına mükafatını alıb, 2018-ci ildə Gürcüstan Milli Elmlər Akademiyasının akademik Aleksandr Tvalçrelidze adına mükafatına layiq görülüb.

Tədbirdə akademik Vasif Babazadənin ömür yoluna həsr olunmuş videoçarx nümayiş edilib.

Sonra Milli Məclisin Aqrar siyasət komitəsinin sədri Tahir Rzayev çıxışında qeyd edib ki, akademik Vasif Babazadə alim, insan, vətəndaş, müəllim kimi etalondur: “Görkəmli alim dövlətimizə, çalışdığı kollektivə həmişə sədaqətli olub. O, bütün uğurlarını öz əməyi və fəaliyyəti nəticəsində qazanıb”.

Elm və Təhsil Nazirliyinin Geologiya və Geofizika İnstitutunun direktoru akademik Akif Əlizadə, Riyaziyyat və Mexanika İnstitutunun direktoru AMEA-nın müxbir üzvü Misir Mərdanov, Neft və Qaz İnstitutunun direktoru akademik Fəxrəddin Qədirov, Respublika Seysmoloji Xidmət Mərkəzinin direktoru AMEA-nın müxbir üzvü Qurban Yetirmişli, Ekologiya və Təbii Sərvətlər Nazirliyinin Geoloji Kəşfiyyat Agentliyinin İdarə Heyətinin sədri Əli Əliyev, BDU-nun professoru, AMEA-nın müxbir üzvü Təhsin Mütəllimov, Gürcüstan Milli Elmlər Akademiyasının akademiki Givi Gavardaşvili, BDU-nun professoru, Jurnalistika fakültəsinin Milli mətbuat tarixi kafedrasının müdiri Cahangir Məmmədli, Ekologiya və torpaqşünaslıq fakültəsinin Coğrafi ekologiya kafedrasının professoru Şövqi Göyçaylı, “Azerbaijan İnternational Mining Compani Limited” şirkətinin baş geoloqu Anar Vəliyev, akademik Vasif Babazadənin yetirməsi, Mərmərə Universitetinin magistri Samirə Novruzova çıxışlarında görkəmli alimin Azərbaycan elmi və təhsilinin, BDU-nun inkişafında mühüm xidmətlərindən bəhs ediblər. Çıxışlarda qeyd olunub ki, Vasif Babazadənin elmi fəaliyyəti geologiyanın müxtəlif sahələrini əhatə edir. Onun araşdırmaları daha çox filiz yataqları və metallogeniyanın öyrənilməsi ilə bağlıdır. Geoloq alim kiçik Qafqazın qızıl yataqlarının tədqiqi sahəsində böyük işlər görüb.

Akademik Vasif Babazadə konfransın təşkilatçılarına və iştirakçılarına təşəkkürünü bildirib.

Konfrans plenar və bölmə iclasları ilə davam edib.