Bakı Dövlət Universitetində (BDU) akademik Nizami Cəfərovun Ümummilli Lider Heydər Əliyevin 100 illik yubileyinə həsr olunmuş "Heydər Əliyev: Dil, ədəbiyyat və incəsənət" kitabının təqdimat mərasimi keçirilib.

AZƏRTAC xəbər verir ki, mərasimdə çıxış edən BDU-nun rektoru Elçin Babayev Ulu Öndər Heydər Əliyevin Azərbaycan dilinin, ədəbiyyatının, mədəniyyətinin inkişafına daim böyük önəm verdiyini bildirib, "Heydər Əliyev: Dil, ədəbiyyat və incəsənət" kitabının əhəmiyyətindən danışıb.

Qeyd olunub ki, kitabda Ulu Öndər Heydər Əliyevin Azərbaycan dili, ədəbiyyatı və incəsənətinin inkişafındakı tarixi xidmətləri barədə geniş təsəvvür yaradılır. Həmçinin Azərbaycan mədəniyyətinin bu sahələrinin hər birində Ulu Öndərin gördüyü işlərin, həyata keçirdiyi layihələrin xalqın ideya-mənəvi tərəqqisinə strateji təsiri əsaslandırılır.

Milli Məclisin Mədəniyyət komitəsinin sədri Fazil Mustafa, mədəniyyət nazirinin müavini Fərid Cəfərov və digər çıxış edənlər də kitabla bağlı fikirlərini bildirib, nəşrin Azərbaycan tarixi, elmi və mədəniyyəti üçün dəyərli töhfə olduğunu vurğulayıblar.