Dekabrın 20-də AMEA-nın akademik Z.Bünyadov adına Şərqşünaslıq İnstitutunun təşkilatçılığı ilə akademik Ziya Bünyadovun 100 illiyinə həsr olunmuş “Qədim və müasir Şərq: mənbələr, tədqiqatlar, perspektivlər” mövzusunda beynəlxalq elmi konfrans keçirilir.

Konfrans iştirakçıları əvvəlcə Fəxri xiyabanda Ulu Öndər Heydər Əliyevin və Sovet İttifaqı Qəhrəmanı, akademik Ziya Bünyadovun məzarını ziyarət ediblər.

AZƏRTAC xəbər verir ki, beynəlxalq konfransda Azərbaycanla yanaşı Rusiya, İraq, Misir, Qazaxıstan, Özbəkistan, Ukrayna və Belarusdan alim və mütəxəssislər iştirak edirlər.

Tədbirdə çıxış edən AMEA-nın prezidenti akademik İsa Həbibbəyli beynəlxalq elmi konfransın Azərbaycan Prezidentinin bu ilin sentyabrında imzaladığı “Akademik Ziya Bünyadovun 100 illik yubileyinin qeyd edilməsi haqqında” Sərəncamına əsasən keçirildiyini bildirib. AMEA rəhbəri

görkəmli şərqşünas-alim və ictimai xadim, akademik Ziya Bünyadovun həyat və fəaliyyətindən söz açıb, alimin fundamental tədqiqatları ilə Azərbaycan şərqşünaslıq və tarix elmlərinin inkişafına mühüm töhfələr verdiyini söyləyib. Qeyd edib ki, özünəməxsus elmi məktəb yaratmış Z. Bünyadov AMEA-nın inkişafına da əvəzsiz töhfələr verib.

Rusiya Elmlər Akademiyası Şərqşünaslıq İnstitutunun elmi rəhbəri akademik Vitali Naumkinin videoçıxışı konfrans iştirakçılarının diqqətinə çatdırılıb. Akademik Ziya Bünyadovun postsovet məkanında və onun hüdudlarından kənarlarda, daha öncə isə Sovet İttifaqında tanınan görkəmli ərəbşünas olduğunu deyən akademik V.Naumkin onun Qafqazın, Yaxın Şərqin, Ərəb dünyasının orta əsrlər tarixini araşdıran böyük alim kimi şərqşünaslıq elmində xidmətlərini qeyd edib. Ziya Bünyadovun Sovet İttifaqı Qəhrəmanı kimi çətin müharibə yolunu keçdiyini qeyd edən rusiyalı alim onun həm də görkəmli ictimai və siyasi xadim olduğunu, Azərbaycan xalqının milli dirçəlişində mühüm rol oynadığını söyləyib.

Konfransda çıxış edənlər görkəmli alimin elmi, ictimai-siyasi fəaliyyətindən söz açıb, onunla bağlı xatirələrini bölüşüblər.

Tədbirdə “Elmimizin Ziya Bünyadov zirvəsi”, “Ziya Bünyadov – görkəmli mənbəşünas alim kimi”, “Mərkəzi Asiyanın mədəniyyəti tarixi akademik Ziya Bünyadovun tədqiqatlarında”, “Ziya Bünyadov və Avropa fondlarındakı Xarəzm əlyazmaları” və digər mövzularda məruzələr dinləniləcək.

Konfrans işini bölmə iclasları ilə dekabrın 21-də davam etdirəcək.