Dekabrın 18-də Azərbaycan Milli Elmlər Akademiyasında AMEA-nın ilk prezidenti akademik Mirəsədulla Mirqasımovun anadan olmasının 140 illik yubileyinə həsr edilən elmi konfrans keçirilir.

AZƏRTAC xəbər verir ki, tədbirdə çıxış edən AMEA-nın prezidenti akademik İsa Həbibbəyli tanınmış ictimai xadim, ilk azərbaycanlı alim-cərrah, ilk tibb elmləri doktoru, Əməkdar elm xadimi, akademik Mirəsədulla Mirqasımovun həyatı, elmi və ictimai fəaliyyətindən söz açıb. İ.Həbibbəyli bildirib ki, Azərbaycan Elmlər Akademiyasının qurucu prezidenti kimi elm tariximizə xüsusi yeri və rolu olan akademik Mirəsədulla Mirqasımov Azərbaycanda cərrahiyyə və urologiyanın elmi əsaslarını yaradıb, tibbi cərrahiyyə elmi məktəbinin əsasını qoyub. Azərbaycanda elmin inkişafında görkəmli alimin mühüm xidmətləri olub. Pedaqoji fəaliyyətlə məşğul olan alim ömrünün sonunadək Azərbaycan Tibb Universitetində və Bakı Dövlət Universitetində dərs deyib, tibb üzrə kadrlarin hazırlanmasına töhfə verib.

Mirəsədulla Mirqasımovun adı xalqımızın qürur və məhəbbətlə çəkdiyi adlar sırasında xüsusi yer tutur.

Tədbirdə “Akademik Mirəsədulla Mirqasımovun həyatı və elmi-pedaqoji fəaliyyəti”, “Akademik Mirəsədulla Mirqasımovun Azərbaycan Tibb Universitetinin inkişafında rolu”, “Azərbaycanda urologiya elminin təşəkkülü və inkişafı” və digər mövzularda məruzələr dinləniləcək.

Konfransda akademik Mirəsədulla Mirqasımova həsr olunmuş film nümayiş etdirilib.