Ailə, Qadın və Uşaq Problemləri üzrə Dövlət Komitəsi Kiçik və Orta Biznesin İnkişafı Agentliyinin (KOBİA) əməkdaşlığı ilə “Tikinti sektorunun inkişafında qadınların rolu, problem və perspektivləri” mövzusunda konfrans keçirilir.
×
Ailə, Qadın və Uşaq Problemləri üzrə Dövlət Komitəsi Kiçik və Orta Biznesin İnkişafı Agentliyinin (KOBİA) əməkdaşlığı ilə “Tikinti sektorunun inkişafında qadınların rolu, problem və perspektivləri” mövzusunda konfrans keçirilir.
AZƏRTAC xəbər verir ki, konfransın təşkilində məqsəd tikinti sektorunda qadınların fəaliyyətinin artırılması, inkişaf problemlərinin araşdırılaraq, bu sahə üzrə müvafiq proqramın hazırlanmasına dəstək göstərilməsidir.
Tədbirdə çıxış edən Ailə, Qadın və Uşaq Problemləri üzrə Dövlət Komitəsinin sədri Bahar Muradova bildirib ki, qadınlar istənilən sahədə, o cümlədən tikinti sahəsinin inkişafında da öz töhfəsini verə bilər. Bu sahədə, eləcə də qadınların iqtisadi fəallığının artırılması istiqamətində dövlət səviyyəsində kifayət qədər uğurlu addımlar atılır. Bütün bunlara baxmayaraq, hələ də gender bərabərsizliyi sahəsində müəyyən problemlər mövcuddur.
Qeyd olunub ki, Dövlət Komitəsi tərəfindən qadınların tikinti sektoruna və digər sahələrə cəlb edilməsi ilə bağlı bir sıra layihələr həyata keçirilir. Belə ki, kənd yerlərində 13 min qadın iqtisadi fəaliyyətə cəlb edilib, 627 biznes strukturu yaradılıb.