“Sumqayıt Texnologiyalar Parkı” (STP) MMC tərəfindən “Sabahın gücü” İnkişaf Proqramı çərçivəsində Məzun günü keçirilib.

AZƏRTAC xəbər verir ki, “Sabahın gücü” İnkişaf Proqramı ölkədə ilk dəfə olaraq STP tərəfindən mühəndislik sahəsində təhsil alan gənclərin sənaye mühəndisliyi istiqamətində peşəkar inkişafını yüksəltmək məqsədilə yaradılan proqramdır. Proqramın məqsədi ölkəmizdə aparılan kadr potensialının yüksəldilməsi siyasətinə töhfə verməklə yanaşı, müasir çağırışlara uyğun olaraq sənaye sahəsində fəaliyyət göstərəcək uğurlu gənc kadrların yüksək səviyyəli peşəkarlar kimi hazırlıqlarını təmin etməklə, ölkə gənclərinin inkişafına dəstək verməkdir.

2023-cü ildə start verilən proqrama gənclərin marağı böyük olub. Proqramın elan olunmasından sonra keçən bir ayda 1000-dən çox gənc müraciət edib. Aparılan seçimlər nəticəsində müraciətçilərin arasından proqrama cəlb edilmiş 50 gəncdən 43 nəfəri proqramı uğurla bitirib. Proqram müddətində təcrübəçilərin texniki biliklərinin və bacarıqlarının artırılması məqsədilə müxtəlif təlimlər təşkil edilməklə yanaşı, onların peşəkar hazırlığını da təmin etmək üçün STP-nin əməkdaşları arasından mentorlar komandası formalaşdırılıb. İnkişaf proqramına sənaye, mexanika, kimya və elektrik mühəndisləri, proseslərin avtomatlaşdırması və informasiya texnologiyaları üzrə mütəxəssislər, texniki peşə sahibləri cəlb olunub.

Tədbirdə çıxış edən STP Şirkətlər Qrupunun insan resursları üzrə baş inzibatçısı, “Sabahın gücü” İnkişaf Proqramının rəhbəri Şölə Əliyeva STP üçün gənclərin inkişafının prioritet məsələlərdən olduğunu qeyd edib. Son 3 ildə 250-dək gəncin peşəkar sənaye mühəndisi kimi inkişaf etdirildiyi vurğulanaraq, bu istiqamətdə “Sabahın gücü” İnkişaf Proqramının məqsədinin daha çox gənci prosesə cəlb etməklə, ölkə gəncləri arasında sənaye mühəndisliyi sahəsinə marağın daha da böyüdülməsi olduğunu deyib.

Proqramı uğurla bitirmiş gənclər STP Şirkətlər Qrupunun fərqli şirkətləri ilə bərabər, ölkəmizdə sənaye sahəsində fəaliyyət göstərən digər böyük şirkətlərdə də iş imkanı əldə ediblər.

Tədbirdə bir sıra ali təhsil müəssisələrinin rəhbərləri məzunları təbrik edib, onlara gələcək fəaliyyətlərində uğurlar arzulayıblar. STP Şirkətlər Qrupunun rəhbərliyi, öz növbəsində, proqram çərçivəsində dəstək göstərən ali təhsil müəssisələrinin rəhbərlərinə təşəkkürnamələr təqdim edib.

Həmçinin tədbirdə gələcək layihələrdə qarşılıqlı əməkdaşlıq məqsədilə Təhsil İnkişaf Fondu və STP arasında anlaşma memorandumu imzalanıb.