“Azərpoçt” 2023-cü ildə 4,6 milyon manat xalis gəlir əldə edib.

AZƏRTAC xəbər verir ki, bunu “Azərpoçt” MMC-nin İdarə heyətinin sədrinin vəzifələrini müvəqqəti icra edən İsi Mustafayev “2023-Hesabat” adlı tədbirdə bildirib.

"Son 3 ildə qurumun aktivləri 5 dəfəyə yaxın artaraq 774 milyon manata çatıb, müştəri bazasının artımı hesabına müştəri qalıqlarının həcmi isə 2020-ci ilə nisbətdə 10 dəfə artıb. 2020-ci ildə 7,7 milyon manat xalis zərər olmasına baxmayaraq 2023-cü il ərzində 4,6 milyon manat xalis gəlir əldə edilməsinə nail olunub", - deyə İsi Mustafayev vurğulayıb.

İ.Mustafayev əlavə edib ki, “Azərpoçt” son dövrlərdə maliyyə institutları ilə iş sahəsində də fəallıq göstərib, yenilənmə mərhələsində müxtəlif işlər görülüb: “İşlər üç - araşdırma, transformasiya prosesi, yeni layihələrin yaradılması və icrası mərhələlərində aparılıb. "Azərpoçt" regionlaşma mərhələsində bütün poçt şöbələrində araşdırmalar aparıb. Bunun nəticəsində klassik qaydada fəaliyyət göstərən poçt şöbələri yenilənib”.

Eyni zamanda nəzərə çatdırılıb ki, “Azərpoçt”un 2024-cü il üzrə əsas hədəfi yenidən əməkdaşların maddi rifah səviyyəsinin yüksəldilməsi olacaq ki, büdcə xərclərində də bu istiqamətdə 15 faizlik artım nəzərdə tutulub.